Trikitixa ezagutaraztea eta sustatzea da bi erakundeen nahia eta egoitza bertan izateaz gain, trikitixa eta bere munduaren inguruko lanketa eta hedapena egiteko hitzarmena ere badute. Hala, 2023ko hitzarmena sinatu berri dute Aitor Larrañaga Kultura Batzordeburuak eta Manex Torrealdai Trikitixa Elkarteko lehendakari ordeak. Sinaduran izan zen, Trikitixa elkarteko kide Andoitz Antzizar ere.

Larrañagak eskerrak eman nahi izan dizkie: “Azpeitian kultur mugimendu bizi eta aberatsa izateko lan handia egin izan dugu eta Trikiti Elkartea mugimendu hori aberastera etorri da”. Trikitiak bailaran izan duen indarra eta garrantzia ere nabarmendu nahi izan ditu: “Azpeitian eta eskualdean Euskal kulturaren eta bizitzeko modu baten ardatza izan da, luzaroan, eta kultura hori ezagutarazi, gordetzeko eta zabaltzeko beharrezko baliabideak jartzea dagokigu guri”. Kulturalki ez ezik, “historikoki eta gizarte ikuspegitik ere balio handia” duela Trikitixa Elkarteak eta egiten duen lana azpimarratu du: “Gure aurrekoen izateko eta bizitzeko modua islatzen du trikitixak eta haren bueltako guztiak, baita gure hizkuntzaren eta gizartearen joan-etorriak ere”.

Manex Torrealdaik bere aldetik “euskararen adierazpen kultural adierazgarrienetakoa da trikitixa eta bereziki Urola Erdian eta Azpeitian” azpimarratu nahi izan du. Hori horrela, “Trikitixa Elkartearen egoitza nagusia Azpeitian izateak bertako kultur mugimenduarekin bat egitea dakar, eta udalaren laguntzarekin, mugimendu horren aniztasuna aberasten dugu”. Era berean “trikitixaren etengabeko eraldaketa eta honek dakarren eguneratzea, elkarlanean behar du izan” eta horretarako “Azpeitiko udalaren laguntza ezinbestekoa da guretzat eta euskal kulturarentzat”. Azpeitiko Udalaren prestasuna eskertu nahi izan “trikitixaren bidaide dugun udala” dela azpimarratuz.