Gaur iritsiko dira Olentzero eta Mari Domingi herriko ikastetxeetara, haurrak agurtzera. Azken urteotan, abenduaren 24 eguerdian ere, plazan herriko haurrekin elkartzeko parada egin ohi izan dute. Aurten, ordea, ongietorria antolatzen duten ikastetxe eta kultur eragileekin elkartuta, bizi dugun alarma egoera aintzat hartuta, plazara ez etortzea adostu dute.
Abenduaren 24an herrian ikusteko aukerarik ez bada izango ere, Udalaren bidez herriko haurrentzat mezu bat bidaltzekotan gelditu dira. Ukitu ezin badira ere, ikusi, entzun, sentitu eta sumatuko dira herrian.
Horretaz gain, beraiei zuzendutako gutunak jasotzeko postontziak ere jarriko dira igerileku aurrean, anbulategi aurrean eta udaletxe azpian. Udala arduratuko da gutunak jaso eta ordurako Mari Domingi eta Olentzerori emateaz.
