Gipuzkoako Foru Aldundiaren elkarlanaren bidez, ElkarEkin proiektu estrategikoa dago abian. Hala, bi lan lerroren bidez bilatzen da integrazioa eta laneratzea.
Alde batetik, laneratzeko prestakuntza ibilbide integratu berriak abian jarri dira. Oinarrizko konpetentzien prestakuntza eta Bigarren Mailako Lanbide Zihurtagirien eskaintza indartzea da helburua, pertsona gehienek izan dezaten aukera lan merkatuan sarbidea izateko.
Testuinguru horretan, Azpeitian bi ikastaro dira abian. Irailaren bukaeratik 15 pertsona ari dira Azpeitiko Basazabal Jauregian Oinarrizko Konpetentzia Formakuntza Ikastaroan parte hartzen. Hori bukatzean, bigarren mailako profesionaltasun-ziurtagirien ikastaroak egiteko aukera izango dute. Proiektu horri esker 45 pertsonak eman diote hasiera laneratzeko prestakuntzari.
Ildo beretik, oinarrizko ikastaroarekin koordinatuta Azpeitiko Udalaren bitartez, Mendeko pertsonei Arreta Laguntza Lanbide Ziurtagiriaren edizio berri bat ere abian da urritik. Ikastaro horren bidez, beste 15 pertsonek dute profesional ziurtagiria ateratzeko aukera. Izarraitz Lanbide Heziketaren bidez, bigarren mailako soldadurako lanbide ziurtagiri berria ere abian da eta 15 pertsona ari dira ikastaro hori egiten.
Bestetik, bigarren lan lerro nagusia, inklusio soziolaboraleko zerbitzu sare integratua garatzea da, eskualdeko laneratze eta gizarteratze eragileen koordinazioa eta elkarlanaren bitartez. Ildo honetan, otsailean abian jarritako UrolanEkin Sarean, eskualdeko egoeraren diagnostiko eta beharrak aztertu, eta lehentasunezko ekintza lerroak adostu ziren, enplegu eta arlo sozialeko eragileen artean ekintza plana aktibatuz, proiektu talde desberdinekin, Iraurgi Berritzenetik koordinatuta. ekintza plan horrek ahalbideratu du, besteak beste, 6 ekintza eta proiektu talde desberdin aktibatzea. Horien artean aipatzekoa da, datozen egunetan herritar eta eragileei banatuko zaien Urola Erdiko gizarteratze eta laneratze eragileen baliabideen mapa, eskualdean eskaintzen diren zerbitzuak ezagutzera emateko.
Azpeitiko Udalak azken urteotan egin bezala langabeziari aurre egin eta herritarren enplegugarritasuna eta integraziorako tresna gisa formazio eskaintza indartzen eta zabaltzen jarraitzeko konpromiso osoa du. Osasun alarma egoerak langabezia tasaren bilakaera ezegonkorra ekarri du; azaroan %9koa izan da herrian, eskualdeko, Gipuzkoako eta EAEkoaren azpitik. Formazioak duen garrantziaren jakitun, Basazabalgo Formazio Zentroaren bidez arlo horretan sakontzen jarraituko du.