Ostalaritza zerbitzuko arduradunekin bilera egin du gaur Azpeitiko Udalak. Eusko Jaurlaritzak pasa den ostiralean emandako itxiera aginduaren aurrean, Udalak aurreikusitako hainbat laguntza eta asmoren berri eman eta beraien ekarpenak jaso ditu. “Oso egoera zaila bizi du ostalaritzak ere. Sektore honetako jabe eta langileak ekonomikoki gaizki pasatzen ari dira. Bilera honen bidez, beraien kezka, ekarpen eta iritziak jaso nahi izan ditugu. Azken finean, herriaren arazoak udalaren arazo ere badira, eta guztioi dagokigu aurre egitea”, adierazi du Nagore Alkorta alkateak.
Egoera horren aurrean udalak ostalariei bere babesa adierazteaz gain, sustapen ekonomikoaren baitan, baliabide publikoak jartzeko konpromisoa adierazi die: “Egoera konplikatua bizi dugu guztiok. Pandemia garaiko beharrei aurre egiteko Sustapen Ekonomikorako Plan Integrala osatu genuen maiatzean; eta, orain, egoera berezi honi erantzuteko, dirulaguntza lerro berri batekin osatuko dugu ostalaritza babesteko”, gaineratu du.
Alkateak azaldutakoaren arabera, laguntzak bi norabidetan eskainiko ditu: alde batetik, gogorarazi du, Udal Laguntzen bidez ostalaritzako langileek, hainbat laguntza eskuratu ditzaketela berain egoera ekonomikoa larria bada. Pandemia garaian egindako egokitzapenei esker, ekonomikoki gaizki pasatzen ari diren herritar guztiek dute horretarako aukera. Bestetik, ostalaritza sektorea babesteko eta une honetan dituzten gastuei aurre egin ahal izateko lerro berri bat lantzen ari da udal gobernua. Proposamena ekonomia batzordean aztertu eta ahalik eta eperik laburrenean bideratu nahi da.