Azpeitiko Udalak hitzarmena sinatuz proiektua bultzatzeaz gain, energiaren kontsumoa murriztu eta energia berdearen aldeko apustua berretsi nahi izan du: "Oso positiboa iruditzen zaigu ikastetxeek proiektu honen bidez lortutako aurrezkiak eraginkortasun energetikoa hobetzeko inbertitzeko proposamena. Euronet proiektu honen hezkuntza-komunitate osoa inplikatzen du (irakasleak, ikasleak, guraso elkartean...). Ikastetxeok zuen kontsumoa gutxitzeaz gain, haur eta gaztetxoak irtenbidearen parte izateko hezten dituzue, gainera", azaldu du alkateak.
Egitasmo hau herrira zabaltzeko 'Euronet 50/50 etxean' ere abian jarriko da eta urasoei zein zentroetako langileei zuzendutako tailerrak egiten ari dira, helburu berarekin. Energia kontsumoa gutxitzea.
Proiektua modu pedagogiko batean zabaltzeko helburuarekin, LUR izeneko pertsonaia sortu da; LURrek energia aurrezteko aholkuak ematen dizkie ikasleei. Horretarako, martxoaren lehen astetik aurrera, PDF modura eskuragarri egongo diren bi gida didaktiko eta poster pedagogiko bat landu dira, ikasleek informazio guztia eskura izan dezaten.
Udala ere ari da neurriak hartzen
Azpeitiko Udalak, arazoaren larritasunaren jakitun, urteak daramatza energiaren kontsumoa gutxitzeko eta energia berdea sustatzeko lanketan. Hala, udaltzaingoan auto elektrikoak ditu eta herriko argiterian ere LED-ak daude jarrita,
"Proiektu garrantzitsu eta inbertsio handiena igerilekuan egin dugu. Igerilekuak edo kirol instalakuntzak izan ohi dira herri gehienetan kontsumo handiena duten eraikinak. Eta hango kontsumoa gutxitzeko ur termalen inguruko proiektu berritzailea egin genuen lehenik, eta eguzki plakak jarri eta eraikinaren isolamendua hobetuz beste pauso garrantzitsu bat eman dugu", adierazi du Alkortak.
Neurri horiek hartuz, 2018tik 2019ra %7 jaitsi da energiaren kontsumoa udal eraikinetan; %18a 2013tik. Hala ere, helburua %35a jaistea da.
Orain arte emandako pausoak
Ikasturte hasieran, proiektua ikastetxeei aurkeztu zitzaien eta horrekin batera hasierako lanak abian jarri ziren. Lehenik eta behin energia taldeak osatu ziren, ikastetxe bakoitzaren izaera edo funtzionamendua aintzat hartuz eta Eskola Agenda 21arekiko koordinazioa bermatuz. Oro har, Energia Taldea ondoko eragileek osatzen dute: ikasleak, ikastetxeko zuzendaria, irakasle bat, atezaina eta Udal Ingurumen edo Iraunkortasun arduraduna. Horik dira, hain zuzen, ikasturte osoan proiektua bultzatuko dutenak eta, proiektua eskola-komunitate osoari helarazteko arduradunak.
Lehenik eta behin, ikastetxe bakoitzaren Energia Taldeak euren eraikinaren energia diagnostikoa osatu behar dute ondoko galderei erantzuna emanez: zeintzuk dira energia gehien kontsumitzen duten tresnak? Geletako tenperatura egokia al da? Berogailua egokitzeko aukerarik al dago? Eta argiteriari dagokionez?, etab. Ondoren, eta informazio horretatik abiatuz, energia kontsumo arduratsuagoa egiteko bideratutako Plan bat egin eta berau zabaldu behar dute, ikasle, irakasle eta gainontzeko eragileen inplikazioa lortu ahal izateko. Azkenik, horren guztiaren emaitzak kalkulatu behar dira, hau da, argindarra eta erregai edo gas kontsumoa murriztu ote den aztertu.
Parte-hartzea ezinbestekoa da
Hau guztia aurrera eramateko eragile guztien inplikazioa eta konpromisoa ezinbestekoa da eta horren erakusle da gaur udalen eta ikastetxeen artean sinatu den hitzarmena. Alde batetik, Udalek proiektuari sostengua emateko konpromisoa hartu dute eta, bestetik, ikastetxeek berau aurrera eramateko eta lortutako aurrezkiak euren eraikinen eraginkortasun energetikoa hobetzeko inbertitzeko.
Euronet proiektua hezkuntza-komunitate osoaren (irakasleak, ikasleak, guraso-elkartea, atezainak, etab.) parte-hartzean oinarritzen da, energia-kontsumoa murrizteko erronkan inplikatzeko. Helburu horrekin "Euronet 50/50 etxean" ekimena ere abian jarri da. Gurasoei zein zentroetako langileei zuzendutako tailerrak egiten ari dira, ekimena bera, kontsumoen jarraipenaren garrantzia eta energia modu arduratsuan kontsumitzeko jarraibideak etxe guztietara helaratzeko asmoz.