Azpeitiko Udalak bere babesa eta elkartasuna adierazi nahi dizkio atzo hil zen lau urteko umearen familiari eta gertukoei. Nagore Alkorta Azpeitiko alkateak adierazi du "denentzat oso momentu gogorra dela" lau urteko ume baten heriotza. Aldi berean, zehaztu du baliabide tekniko eta humano guztiak familiaren esku jarriak dituela momentu latz hauetan "ahalik eta babesik handiena sentitu dezaten".
Atzo arratsaldeko gertakarien harira, Ertzaintzat ikerketa duela irekita kasua argitzeko azpimarratu du, eta erakunde horri bere lana egiten uzteko eskatu du. Era berean, Udalaren izenean, familiaren izenean eta Karmelo Etxegaraiko zuzendaritzaren izenean errespetua eskatu du: "Utz ditzagun alde batera espekulazio eta zurrumurruak momentu gogor hauetan inori ez diotelako onik egiten, kalte baizik. Saia gaitezen denon artean familiari ahalik eta babesik eta laguntzarik handiena eskaintzen".
