Euskara ikasteko oinarrizko eskola trinkoak eskainiko dira otsailaren 3tik martxoaren 13ra; izen ematea zabalik da

Otsailaren 3tik martxoaren 13a bitartean, euskaraz ikasteko oinarrizko mailako ikastaro trinkoa eskainiko da Udal Euskaltegian. Ikastaroa astelehenetik ostiralera, 9:00etatik 12:00etara bitartean izango da.

"Ikasturtea urrian hasi genuen Udal Euskaltegian, baina 4-5 lagun gerturatu dira azken asteotan euskaltegira euskaraz ikasteko asmoarekin. Ikasturte hasieran osatutako oinarrizko taldeek beren dinamika hartua dute, eta horietan zuzenean sartu beharrean, ikastaro trinkoa eskainiko dugu aurrez", adierazi du Eneritz Albizu Euskara zinegotziak. Hala, ikastaro trinko horren ostean, parte hartzaileek gaur egun euskaltegian abian diren taldeetan euskara ikasten segitzea da asmoa. Ikasturte hasieran esandako ere berretsi nahi izan du Albizuk: "Euskara ikasi nahi dutenentzat atea beti zabalik dugula adierazi genuen, eta nahiz eta urrian izan matrikulazio epea, euskaraz ikastea nahi duten herritarrak daudela jakinik, baliabide gehiago jartzea erabaki dugu". 

Feminismoa eta arrazakeriaren inguruko hitzaldia izango da asteazkenean 18:30etatik aurrera Basazabal jauregian

Zas Zurrumurruen kontrako Euskal Sareak zurrumurruen kontrako proiektu bat sustatu du, eta proiektu horren baitan kokatzen da asteazkenean Azpeitiko Udalak, Emakume Txokoko tailer eta ekintzen baitan, antolatuta egingo den mahaingurua. Genero zapalkuntza eta arraza zapalkuntza gurutzatzearen ondorioak aztertuko dira. Hizlarien azalpenen ondoren, parte hartzaileen artean gaiaren inguruan solasteko aukera izango da. 

Hizlariak: Irantzu Varela eta Norma Vázquez

Eguna: Urtarrilak 29, asteazkena

Ordua: 18:30etan

Lekua: Basazabal jauregia

Enpresa ideiak garatzeko diru-laguntza eskaerak egiteko epea zabalik da ekintzaileentzat

Azpeitiko Udalak, Iraurgi Berritzen eta Lanbiderekin elkarlanean, enpresa ideiak garatzeko ekintzaileei bideratutako bi diru-laguntza lerro jarri ohi ditu abian. “2010ean, Azpeitiko Udalak eskualdeko beste udalekin elkarlanean, plan estrategikoa aurkeztu eta tramitatu zuen, eta horren baitan laguntzen dira diruz ekintzaileak”, adierazi du Nagore Alkorta Azpeitiko alkateak. Diru laguntza horien bidez eskualdeko (Azkoitia, Azpeitia, Zestoa, Errezil, Beizama eta Aizarnazabal) ekintzaile gazteak lagundu nahi dira batez ere: “Ekintzaile izan daitezkeen gazte ugari ditugu, eta horiek ahalduntzeko eta laguntzeko diru-laguntzak dira honakoak eta horiek animatu nahi ditugu beren proiektuak aurkeztera”. Urtarrilaren 29tik otsailaren 14ra bitartean aurkeztu beharko dute proiektua laguntza eskuratu nahi dutenek.

Uraren saneamendua hobetzeko lanak egiten ari dira Olatz auzoan

Azpeitiko Udala Gipuzkoako ur kontsortzioaren bidez, Olatz auzoko ur saneamendua hobetzeko lanak egiten ari da. Orain artean ur estaldura soilik zegoen, eta orain gauzatzen ari diren lanen ondoren, ur saneamendu sarea ere izango du auzoak. Hala, euri urak ibaira joango dira zuzenean obren ostean, eta ur zikinak Lasaoko araztegira.

"Beharra ikusita eta Denon Artean prozesuaren baitan auzotarren eginiko eskaera bati erantzunez hasi ditugu obrak. Auzoetako beharrei eta herritarren eskaerei erantzuten saiatzen gara, eta horren emaitza da abain dugu obra hau", adierazi du Aitor Bereziartua hirigintza zinegotziak. Obren aurrekontua 114.077€koa (+ BEZ) da. 

Lan, pentsio eta bizitza duinaren alde, urtarrilaren 30ean, egingo den Greba Orokorraren aldeko mozioa onartu du Udalak

Urtarrileko plenoan Greba Orokorraren harira, mozioa aurkeztu zuen EH Bildu alderdiak. Mozioa EH Bilduren aldeko botoekin onartu zen; EAJtak aurka botatu zuen. 

Otsailetik ekainera bitarteko Emakumeentzako Jabetze Eskolako eta herritar orori zuzenduriko ekimenetan izen emateko epea zabalik da gaurtik

Urte berriarekin batera, berrikuntza ugari datoz Emakumeen Txokoan. Emakumeen Mahaiak, zortzi formakuntza antolatu ditu Jabetze Eskolen barruan, hiru ikastaro orokor eta hainbat ekimen. Jabetze eskolan eta ikastaroetan izena emateko epea gaurtik zabalik da. 

Ikusi eskaintza osoa.