3.150 boto jasota, EH Bilduk izan da alderdi bozkatuena Eusko Legebiltzarrerako hauteskundeetan, Azpeitian

Gaur, uztailak 12, Eusko Legebiltzarrerako hauteskundeak izan dira Euskal Autonomia Erkidegoan. Botoen %100 zenbatuta, EH Bildu izan da Azpeitian alderdi boto gehien jaso dituena; 3.150, botoen %47a. Bigarren indarra EAJ alderdia izan da 3.016 botorekin, %45a. Parte hartzea %59,6koa izan da. 

Pilota partidua izango da uztailaren 17an Izarraitz pilotalekuan

Marter Caixabankeko pilota partidua izango da uztailaren 17an, 22:15etik aurrera, Izarraitz Pilotalekuan. Dagoeneko sarrerak salgai dira bi plataformaren bidez, 25€an: entradium eta proticketing.

Barruko igerilekuko, muskulazioko eta fitness gelako hitzorduak ere sarean hartu daitezke

Ekainaren 15ean ireki zen barruko igerilekua, eta pixkanaka-pixkanaka ari da normaltasuna berreskuratzen. Prebentzio neurriak beharrezkoak dira oraindik, baina udala hasi da erabileraren arabera, neurriak egokitzen. Hala, erabiltzaileei erraztasunak eman asmoz, gaurtik kanpoko igerilekuan bezala, barruko igerilekuko, fitness gelako eta muskulariorako txandak online hartzeko aukera dago www.erreserbak.azpeitia.eus helbidean.

Hainbat aldaketa

Txandei dagokionez, orain arteko erabilera neurtuta, barruko igerilekura astean hiru aldiz joateko aukera izango da hemendik aurrera eta muskulaziora astean bost aldiz, ordu eta erdiz. 

Uda sasoian, abuztuan, mantenu lanak egiteko itxita izan ohi da epe batez barruko igerilekua. Aurten, ordea, alarma egoera dela eta itxita egon den epealdia aprobetxatu da lan horiek egiteko, eta, beraz, abuztu osoa irekita izango da. Kanpoko igerilekua, berriz, irailaren 27a arte irekita izango da. 

Egoera ikusita, normaltasunerako pausoak pixkanaka leuntzen doaz. Udalak orain artean erabiltzaileek erakutsitako jarrera eskertu nahi du, eta denok arduraz jokatzen jarraitzeko deia egin du. 

Joxe Takolo Bekara proiektuak aurkezteko, azken egunak

Astelehenean, uztailak 13 bukatuko da Joxe Takolo Bekara proiektuak aurkezteko epea. Azpeitiko Udalak, Lagun Onak Mendi Bazkunak eta Euskal Herriko Mendi Federazioak eskaintzen dute Joxe Takolo Beka 2001. urtetik, goi mailako mendiko egitasmoak bultzatzeko. Goi-mendia, abentura, zientzia, esplorazioa eta dibulgazioarekin zerikusia duten proiektuak bultzatze 3.000€ko beka da. Proiektuak Azpeitiko Udalean; presentzialki eta egoitza elektronikoaren bidez (udal webgunearen bidez).

Alarma egoera dela-eta hainbat tasen parte proportzionala kobratuko du Udalak

Atzoko uztaileko ohiko plenoan, Azpeitiko Udalak 2020. urteko egutegi fiskala berriro egokitzea erabaki zuen, aho batez. Horretaz gain, alarma egoera dela eta merkataritzako eta ostalaritzako establezimenduen itxieraren ondorioz, beste hainbat tasaren parte proportzionala soilik kobratuko dela ere jakinarazi zuen Nagore Alkorta alkateak.

Datorren ikasturteko kirol jardueretan izena emateko epea astelehenean irekiko da

Azpeitiko Udalaren kirol patronatuak prest du datorren ikasturteko kirol jardueren eskaintza. Ikastaroak irailean hasiko dira eta izen emateko epea irekita izango da datorren astelehenetik. Inskripzioa, ohi bezala igerilekuko harreran egin beharko da.

Haur eta gazteei bideratutako kirol jarduerak, gorputz orekatua lortzeko saioak, gorputza aktibatu eta sasoian jartzekoan, intentsitate altuko jarduerak eta uretako jarduerak antolatu dira 2020/2021 ikasturterako.