Hilabeteetako bide luzearen ostean, atzo eman zitzaion Urrestillan eguzki-plakak ezartzeko proiektua gauzatzeko ezinbestekoa den Plan bereziari onarpena. 2021eko ekainean eman zitzaion hasierako onarpena, eta atzo onartu zen behin betikoz. Behin plan hori onartuta, obra baimenak eskatu eta obrak hasteari ekingo zaio.


Atzora arteko tramitazio bidea azaldu zuen Nagore Alkorta Alkateak. Egin beharreko tramitazio guztia eginda, tartean beharrezko onarpen guztiak jasota, plana onartzeko ezinbestekoak diren Euskal Herriko Lurralde Antolamenduaren aldeko txostena, interes publikoko deklarazioa jasota eta udaleko hirigintza zein idazkaritzako aldeko txostenekin eman zen atzo plenora gaia: “Berme juridiko eta legal guztiak betetzen ditu plan honek”, adierazi zuen.