Neguan haur eta gurasoek jolaserako aterpea izateko helburuz jarri zuen abian Azpeitiko Udalak kiroldegiko txokoa. Abendutik martxoaren bukaerara irekitzea zen hasierako asmoa, baina zerbitzuak duen harrera ona eta erabilera egokia ikusirik, eta hainbat eskaera kontuan izanda, asteburuetan irekita mantentzea erabaki du. Hala ere, orain arteko erabilera aztertu ostean ordutegian hainbat egokitze egingo ditu.
Neguan, haurrekin egon eta jolasteko aterpe baten falta ikusirik proba gisa hasi zen kiroldegiko gune bat familientzako egokitzen. Bertan, 0-8 urte bitarteko haurrak psikomotrizitatea landu eta familian edo beraien arten jolasteko aukera eskaintzen da. Ireki zenetik orain arte, 295 familia ezberdinek erabili dute gunea eta 523 sarrera izan ditu.
Espazioan material ezberdina egoten da erabiltzaileen eskura eta erabilera oso egokia egin da orain artean. Abian jarri zenetik erabiltzaileek hainbat eskaera egin dituzte, eta zerbitzua hobetzeko helburuz erantzuna eman zaie. Besteak beste, material gehiago erosi da eta haur eta helduen erosotasunerako komunetan haur txikiei pardelak aldatzeko gunea jarri da.
Ordutegia egokituko da
Arrakasta ikusirik, eta erabilera aztertu ostean, asteburuetan irekita mantenduko da. Larubata eta igandeetan irekita mantenduko da eta ordutegia 19:30 arte luzatuko da. Ostiraletan aldiz, erabilera txikia egon denez eta kirol jarduera ezberdinek duten erabilera kontuan izanik hemendik aurrera ez da familia txokorik izango. Aste Santuetako opor egunetan, berriz, kiroldegiaren harrera ordutegian irekita egongo da.
Ordutegia:
Larunbata-igandea: 11:00-19:30 bitartean
Jaiegunetan*: 11:00-12:30 (arratsaldeetan itxita)
Pazko Astean: 11:00-12:30 / 17:00-19:30
