Genero berdintasuna bermatzeko eta parekidetasunaren balioekin bat egiten duten zerbitzu ugari daude inguruan. Azpeitiko Parekidetasun Arlotik bereziki, hainbat zerbitzu kudeatzen dira eta horien inguruko informazio eta sarbidea eskaintzen da Emakumeen Txokotik. Zerbitzuak, KONFIDENTZIALAK, PROFESIONALAK ETA DOAKOAK dira.:
- Parte hartze, sentsibilizazio eta integraziorako ekimenak
- Harrera eta informazio zerbitzua: Emakumeei zuzendutako zerbitzuei buruzko informazioa. Indarkeria matxista kasuetarako zerbitzuen informazioa. Protokolo eta jarraibideen aholkularitza. Herriko parekidetasunerako baliabideen informazioa. Izen emateak. Gela eskaerak. Hitzorduak eskatzea, …
- Partaidetza sozialerako gunea:
- Gune informala: emakumeak elkarren artean, modu informalean, elkartzeko, biltzeko eta saretzeko espazioa. Ikuspegi feministan trebatzeko gunea, baliabide feminista desberdinez hornituta, besteak beste, liburutegi feminista, kontsultarako gunea, berdintasun gaietan murgiltzeko Interneterako sarbidea, eta abar.
- Liburutegi feminista: Liburu kontsultak eta liburu eta ikus entzunezkoen maileguak.
- Erreminta mailegua: etxeko lan txikietarako erreminta maileguak
- Aholkularitza juridikoa: Prozesu judizialen eta hauen ondorioen inguruko informazioa ikuspegi feministatik. Gai desberdinen inguruko aholkularitza eskaintzen da: dibortzioak, emakumeen kontrako erasoei buruzko prozesu penalak, dibortzio prozesuetatik sortutako gatazkak, mantenu pentsioen ordainketa ezak, bisita erregimenen ez betetzeak, atzerritartasunarekin lotutako arazoak, etxeko langile zein gainerako langile emakumezkoen kaleratzeak, diskriminazioa, eskubideei buruzko informazioa, laguntza sozialak eta abar. Hilean bi ostegunetan eskaintzen da. Hitzodua eskatu behar da: 688 751 000 telefonora deituta.
