Elikadura jasangarria izan zuten atzo hizketagai ikasleek, Agenda 21aren baitan Udal arduradunekin

Urtero gisa, atzo, maiatzak 5, Agenda 21ean parte hartzen duten 4 ikastetxeetako ikasleak (lehen Hezkuntatik batxilergorainorakoak) Eneko Etxeberria alkatearekin bildu ziren programaren baitan egindako lanetan ateratako ondorioak eta ingurumena hobetzeko zituzten proposamenen berri emateko. Atzokoan, iaz hasitakoari jarraipena emanez, elikadura jasangarria izan zuten hizpide. Ikasturtean zehar, gai hori jorratzeko ekintza ugari egin dituzte ikasleek bai ikastetxean, bai ikastetxetik kanpo ere, atzo alkateari azaldu ziotenez. Hainbat irteera ere egin dituzte horretarako.

Xaguxatarren parkea, bukatuta eta herritarrentzat irekia

Ingurugiro Etxea Museoak parke berria du. Azpeitiko Udalak eta Eusko Jaurlaritzak elkarlanean Xaguxatar izeneko proiektuaren baitan eraberritu da zaharkituta zegoen gune hori. Oraindik ofizialki inauguratu gabe badago ere, parkea irekita dago; eta herritarrek zein bisitariek parkeaz gozatzeko aukera dute. Horrela adostu dute Udalak zein Eusko Jaurlaritzak. "Parkea osatzeko lanak eginda daude, eta Eusko Jaurlaritzarekin hitz egin ostean, irekitzea erabaki dugu. Eguraldi onak hasi diren honetan herritarrek herrian jolasteko eta gozatzeko parke bat gehiago izan dezaten", adierazi du Aitor Bereziartua Ingurumen zinegotziak. Inaugurazio ofiziala bi erakundeen agendak bat egiten dutenean egingo da.

Ekonomia, lehen sektorea eta bertako produktuak sustatzeko motorea izan nahi du azoka plazak

Azoka plaza eraberritzen daramatzagu hainbat hilabete. Berrituta eta itxura aldatuta izango da laster, baina azken hilabeteotan abian jarritako dinamika parte-hartzaile baten bidez kanpoko itxura aldatzetik haratago herriko ekonomia sustatuko duen eta bertako produktuen plaza izango den gune dinamiko bat sortzeko lanetan ari da Udala hainbat eragilerekin elkarlanean.

Azoka plazari bizia emateko asmo horretan, ez du biderik errezena aukeratu. Horren jakitun da Udala. "Supermerkatu handien eskaintzei uko egin eta biderik errazena aukeratu ez arren egokiena aukeratu dugulakoan gaude. Guk plazatik, geuretik, eta iraganetik abiatuta eraiki nahi dugulako etorkizuna. Gure oinarrietatik, lurretik, lehen sektoretik" hasi da proiektuaren nondik norakoak azaltzen Josu Labaka zinegotzia.

Jasangarritasunaren alde, auto elektrikoaren aldeko apustua egin du Azpeitiko Udalak

Azpeitiko Udalak bestelako energia eredu baten aldeko apustua eginda du. Hala, Energia Plana osatu zuen eta energiaren kontsumo arduratsuago eta jasangarriago baten aldeko apustua egina du. Hala, azken hilabeteotan zenbait neurri hartu ditu. Horren adierazle da, pasa den astean jakitera eman zen, iaz Udalaren energia kontsumoaren %3,1a jaistea.

Enegiaren kontsumoa gutxitu eta etorkizun jasangarriago bat eskaintzeko helburu horrekin beste pauso bat gehiago eman du Udalak gaur. Udaltzaingorako kotxe berria erosi beharra izan da, eta kotxe elektrikoaren aldeko apustua egin du: "Kotxe elektrikoa erostearen alde egin dugu, horrelako kotxeak gasolinarik ez gastatzeaz gain, CO2 isuriak nabarmen gutxiago isurtzen dituztelako airera", azaldu du Aitor Bereziartua zinegotziak.

Atzo jarri zuten Plaza Txikian, Udaltzaingoaren aurrean kotxea kargatzeko postea, eta gaur eguerditik martxan da kotxea bera. "Lehenengo kotxe batekin egingo dugu proba, baina honek ongi funtzionatzen badu, etorkizunean ere auto elektrikoen aldeko apustua egingo du Udalak", jarraitu du Bereziartuak. Baina ez da bere horretan gelditzen apustua: "Etorkizunean, erabat burujabe den auto elektrikoa izatea nahi dugu. Hau da, eguzki plaka bidez energia geuk sortu eta horrela autoak bere egunerokoa egitea lortzea dugu helburu", adierazi du.

Autoaren kostua, 13.500 eurotakoa izan da.

Energia kontsumoa %3,1 murriztu zuen Udalak, iaz

Azpeitiko Udalak bere azpiegituren eta argiteriaren kontsumoa zorrotz neurtzen du azken urteotan, energia kontsumoa murriztu eta erabiltzen den energiaren eraginkortasuna edota efizientzia bilatzeko. Hala, 2015eko energia kontsumoa %3,1ean murriztu zuela jakin berri du. "Pixkanaka, gutxinaka, han eta hemen neurriak hartuz udalak energia kontsumoa murriztu, eta energia berriztagarriaren bidez funtzionatzeko konpromisoa du", azaldu du Aitor Bereziartua zinegoztiak. 'Azpeitia 2025 Plan Estrategikoaren' baitan, energia lerro nagusietakoa da. Bertan, eraginkortasun energetikoa, kontsumoaren murrizketa eta energia berriztagarrien ezarpenarekin lotutako ekintza eta neurri desberdinak aurreikusten dira. Bide horretan, lehen lanak ari dira bere fruituak ematen, eta epe motzean abian jartzeko beste neurri batzuk ere eskuartean ditu udalak.

Iazko energia kontsumoaren %69a, udal eraikin publikoena izan zen, eta %31a, berriz, herriko argiteriarena. Eraikin publikoen artean, igerilekua da kontsumo handiena duen azpiegitura, kontsumo osoaren %47a. Ondoren hezkuntzara bideratutako eraikinak dute kontsumo altuena, %25a, eta udal bulegoek, berriz, %8a. "Bagenekien igerilekua dela, askogatik energia gehien kontsumitzen duen azpiegitura. 2014an, igerilekuan energia aurrezteko proiektu pilotoa jarri genuen abian. Baina igerilekuko energia kontsumoa murrizteko neurri gehiago ere hartuko ditugu epe motzean", aurreratu du Bereziartuak.

Kontsumo energetiko horren harira sortutako negutegi efektua eragiten duten gasen isuria ere nabarmen jaitsi du Udalak. Hala, 2014an baino %11,8 gutxiago isuri zen 2015. urtean. Hori elektrizitate berdearen kontratazioak eta gas naturalaren kontsumoa jaisteak eragin du.

Kontsumoak eta kutxadurak behera egin badute ere, gastuak %1,2 gora egin du; energiaren prezioak gora egin duelako. Hala, iaz, 751.148 euroko gastua izan da energiak eragindakoa, hau da, 51,5 euro azpeitiar bakoitzeko.