Bihar, pilota partiduarekin emango zaie hasiera Urrestillako sanjuanei

Goizo emango diete aurten sanjuanei hasiera urrestildarrek. Bihar, ekainak 17, ohiko sanjuanetako pilota partida izango da Txikuri pilotalekuan; bertan Irribarria eta Zabaleta, Altuna II.a eta Resustaren kontra izango dira, 22:00etatik aurrera. Hortik aurrera, asteburu honetan zein hurrengoan, festa izango da nagusi Urrestilan. 

Zinema eta askoz gehiago, San Martin Egoitzan

Bihar, ekainak 15, ekingo diote San Martin egoitzan zinea eskaintzeari; aspaldiko asmo baten lehen pausoa emango dute horrela, San Martin egoitzak, Sanagustin kooperatibak eta Udalak. Bihar, 16:30ean, Amama filma eskainiko dute egoitzako kaperan, eta Asier Altuna zuzendaria ere bertan izango da.

Kultur Mahaiak Soreasuko zine aretoa kudeatzeko proiektuan aiatzen zen Kepa Urbietak aipatu bezala egitasmo hau: "Orduan jarri genuen Soreasu herritartu eta herria soreasuratu behar genuela. Hortik dator zinea herrira ateratzearena. Zineklubarekin elkarlanean udan aire librean zinea botako dugu, eta bihar,  zinea San Martin egoitzara ekarriko dugu" adierazi du.

Santio Egunean egiten den sagardo lehiaketako epaimahaian parte hartzeko deia emakumeei

Azpeitiko Udalak, Festa batzordearen bidez, Santiago Egunean (Uztailak 25) egiten den Sagardo Lehiaketako epaimahaian  parte hartzeko deia egin nahi die emakumei. Aurkezten diren emakumeentzat, epaimahaikide lanak egiten ikasteko, prestaketa-saio batzuk egingo dira aldez aurretik.

Sagardo epaimahaiko kide izan nahi dutenek izena eman beharko dute ekainaren 25a bitartean,  udal kultura sailean, 943 157068 edota 943 15 72 00 telefonora deituta.

Auzoetako festen hasiera ezin hobea

Asteburuan izan da festa aukera gurean. Lasaoko festak, Eliz Kaleko festak eta Sanguandegiko festetan izan da zer ikusia eta zertaz gozatua. "Asteburu osoa izan da benetan pasatu dena. Festa guztiak batera tokatu dira, eta bakoitza bere mailan, giro ederrean joan dira", adierazi du Mikel Ibarzabal Festa Batzordeburuak.

Azken urteotan zenbait auzotako festak indarberritu eta gorakada handia hartu dute: "Auzoetako eragileek egindako lanaren eta Udalak emandako babesaren ondorioz indar handia hartu dute, Sanjuandegiko festek, adibidez". Eta hori poztekoa da Ibarzabalen ustetan: "Urte gutxian buelta eman diote ahulduta zeuden festei, eta festa partehartzaile ederrak antolatzen dira gaur egun. Benetan txalotzekoa eta antolatzaileak zoriontzekoa da hori". Asteburuan, eguraldia ere lagun izan da eta txoko guztietako festak giro onean era aparteko ustekabekorik gabe pasatu dira.

"Hasiera ederra eman diegu auzoetako festen garai fuerteari. Atzetik etorriko dira, askorik itxaron gabe, besteak besteUrrestilako festak-eta", adieraz du bukatzeko.

Bost proiektu lagunduko dira Sorkuntza Bekaren bidez

Banatu da 2016ko sorkuntza beka. Beka honen lehen edizioa egin da aurten, eta Udala "oso pozik" dagoela adierazi du Ainara Larrañaga zinegotziak. Kultur sorkuntzaren bueltan, azken urteotan Kultur Mahairekin egindako lanketaren ondorio da beka hau, "baina sorkuntza eta sortzaile berriak bultzatzeko konpromisoa, azken aste eta hilabeteetan ikusi ahal izan den bezala, beka honetatik haragoko kontua da guretzat", jarraitu du Larrañagak. Bide horretan, gogora ekarri du, Soreasun sorkuntza gunea egiteko prozesua abian dela, eta "horretan gabiltza buru belarri herriko talde eta norbanakoekin".

Bekari dagokionez, guztira 10 proiektu aurkeztu dira, horietatik 8 azpeitiarrek aurkeztu dituzte eta "horrek erakusten du gure herrian badirela kultura sortzeko harra duten herritarrak", azpimarratu nahi izan du. Disziplina askotariko eta maila altuko proiektuak jaso direla jakinarazi du, eta epaimahaiak ez duela lan erraza izan erabakia hartzerakoan.