Proiektuaren helburua euskarak komunikabideetan duen presentzia areagotzea denez eta Azpeitiko Udalak asmo horrekin bat egiten duenez, dirulaguntza emango dio aurtengoan ere udalak UKTri. Horren erakusle, hitzarmena sinatu dute Aitor Larrañaga Azpeitiko Udaleko Euskara batzordeburuak eta Ihintza Elustondo UKTko lehendakariak.
Larrañagak gogorarazi du urte asko direla Azpeitiko Udalak “euskararen erabilera garatzeko, defendatzeko eta sustatzeko jarduerak bultzatzen dituela, bai udalean, hizkuntza normalkuntzarako planaren bidez, bai Dirulaguntzen Plan Estrategikoan aurreikusitako laguntza lerroekin, baita urteko aurrekontuarekin ere”. Bide horretan, euskararen aurkako azken neurrien aurrean, “gogor lanean” jarraitzeko konpromisoa azaldu du: “Azpeitia euskaraz dela esan ohi dugu, eta horrela izan dadin lanean jarraituko dugu udaletik bertatik zein bestelako eragileekin elkarlanean. Horregatik, guretzat garrantzitsuak dira gaur sinatutako hitzarmena bezalako elkarlanerako aukerak”.
Urolako Komunikazio Taldeko presidente Ihintza Elustondok azpimarratu du tokiko hedabideek berebiziko garrantzia dutela euskararen erabilera sustatzeko, komunitateak trinkotzeko eta tokiko garapenean eragiteko: “Zero kilometroko hedabideak gara; herritik eta herriarentzat sortuak, gutaz eta gure hizkuntzan”. 2019tik UKTk argitaratzen ditu Uztarria, Urola Kostako Hitza eta Erlo Telebista Azpeitian, eta aurrera begira ere “azpeitiarrentzat ahalik eta komunikabide onenak eskaintzea” dute helburu. Azkenik, Azpeitiko Udalak emandako laguntza eskertu du Elustondok UKTren izenean, “denen ekarpena ezinbestekoa baita herriarentzat eta euskararentzat hain beharrezkoak diren hedabideei eusteko”.
