Sormen gunea kultur eragileekin batera diseinatu da: “Denbora luzean hitz egin dugu kultur eragileen artean zer eta nolakoa izan behar duen Soreasuk zehazteko, orain irudimenean eta paperean marraztu dugun hori gauzatzen ari gara”, azaldu du Ainara Larrañaga kulturako zinegotziak. Datorren hamarkadako proiektu estrategikoa izango dela kulturarentzat ere azpimarratu nahi izan du: "Azken 8 urteotan kulturak loraldi izugarria egin du gurean, eta plaza eskaintzeaz gain sorkuntzarako azpiegiturak eta baliabideak jartzea da orain helburua. Kultur politika sendo eta propioa dugu, eta Soreasu estrategikoa izango da datozen urteotan".
Lehiaketa, loteka gremioentzat
Lehiaketa publikoari dagokionez, loteka egin da, lehen aldiz: "Loteka ateratzearen helburua herriko gremio txikien Soreasuko obran parte hartzeko aukera izatea izan da. Gremioka banatu dugu proiektuak berak hori ahalbidetzen duelako, eta bakoitzak bere proposamena aurkezteko aukera izan du”, gaineratu du Josu Labaka zinegotziak.
