“Energia berriztagarrien aldeko apustu sendoa egiten dugu guk. Orain, zabortegian sortzen den biometanoa erre egiten dugu, eta helburua da gas hori erabiltzea lortzea. Proiektu interesgarria iruditzen zaigu eta non hobe horrelako prototipo bat Lapatxen baino”, azaldu du Aitor Bereziartua Urola Erdiko Mankomunitateko Lehendakariak.
Nortegas enpresak egingo du gasa garbitu eta gas natural berriztagarria sortu eta sare nagusira bideratzeko prototipoa. Uztailaren hasiera alderako prototipoa Lapatxen izatea aurreikusten da. Behin prototipoa jarrita elkarlanean proba desberdinak egingo dituzte gasa ahalik eta ondoen garbitzeko: “Biometanoa ahalik eta ondoen aprobetxatzeko teknologiarik eta modurik onena bilatzea da helburua, ondoren sare nagusira txertatzeko. Horretarako dauden kalitate neurri guztiak pasatu ondoren”, gaineratu du Bereziartuak.
Proiektu saritua
Aste gutxi barru Lapatxen abiatuko den proiektuak hasiera ona izan du. Izan ere International Gas Union (IGU)-ek ematen dituen sarien artean, 'Gasa eta berriztagarriak' sailean berrikuntza saria eman dio. Saria ekainaren bukaeran Washingtonen (AEB) jasoko dute Nortegas-ek.
Energia berdea
Biometanoa energia berde edo berriztagarri gisa indarra hartzen ari da Europan zein munduan. Europako Batasunak biogasa indartu nahi du alternatiba moldagarri eta jasangarria delako eta negutegi efektua eragiten duten gasen emisioa murrizten laguntzen delako.