Azken urteotan Udalak Alde Zaharrean eskuhartze desberdinak egin ditu, baina eraldaketa sakona eragitea da helburua: "Baina erabat berritzeko eraikinak berritu eta jendea bertan bizitzen jartzea falta da", adierazi du Aitor Bereziartua zinegotziak.
"Ekimen pribatuko eskaintzetan dauden etxe libreen eskaintza, eskaintza publikoarekin orekatu eta arrazionalizatu nahi dugu. Eta, bide batez, eremu urbano zaharkituari irtenbidea eman", azaldu du Josu Labaka zinegoztiak. Etxe zahar asko eta esku askotan daude, eta horrek asko zailtzen badu ere bidea, Udala indar berezia egiten ari da: "Etxeak erosiz Alde Zaharrean eragiteko zailtasun handiak ditugu, etxe zahar asko eta askoren eskutan daudelako eta espektatiba handiak dituztelako askok, hala ere, Elizkaleko 3 etxe atari eta oraingo bi hauek erosita, pauso garrantzitsuak emango ditugu bi norabidetan; etxebizitza publikoen eskaintzan, eta Alde Zaharraren eraldaketan", azpimarratu du Leire Goenaga zinegotziak.
Aurrez, Elizkaleko 3 etxe-atari hitzartuta
Elizkaleko 24 Bis, 26 eta 28 zenbakidun etxe-atariak erostea hitzartua du Udalak eta 12 etxebizitza berri eraikitzeko proiektua egiten ari da, iazko azaroan azaldu zuen bezala.
Horretaz gain, Donejakue kalean bi bloke oso bereganatzeko Udalari falta zitzaizkion etxebizitzak ere erosiak ditu (Xoxoterako bidearen hasieran gelditzen direnak). Eremu horretan etxeak botatzea aurreikusten da, baina ez berriro eraikitzea.