Bigarren fasea, tramiteetan
Bidegorriaren bigarren fasea, Atxubiagako biribilgunetik Urrestilla arteko zatia, Udalak eta Gipuzkoako Foru Aldundiko Mugikortasun Sailaren hitzarmenari esker gauzatuko da. Lanak egiteko aurrekontua jada Udalaren esku da eta zati hori egin ahal izateko tramiteak aurreratzen ari direla orain Udala eta Aldundia jakinarazi du Aitor Bereziartua zinegotziak: "Proiektua onartu eta izan diren alegazioen erantzuteko fasean gara, ondoren, egin behar diren lan administratiboekin amaitu, esleipena egin eta lanak hasi ahal izateko".
Bigarren faseko lan hauekin lehenengoak amaitu ondoren hastea aurreikusten da eta bederatzi hilabete iraungo dute.
Bidegorria, etorkizuneko apustua
Eneko Etxeberria alkateak berriro eskertu du bidegorria egiteko Aldundiak diru hori Azpeitiko Udalari eman izana. “Lorpen handitzat” jo du bidegorria eta gogoratu du Azpeitiko eta Urrestillako bizilagunen aspaldiko eskaera dela: “Aspalditik lantzen ari garen proiektua gauzatzen ikustea berri oso ona da. Bi herrigune oso garrantzitsu lotzen lagunduko du”. Herritarren komunikazioa indartuko duenez “beharrezko” egituratzat jo du, eta bailarako beste hainbat egitura ere bultzatzen dituela nabarmendu du: “Urrestillako bidegorria bezain beharrezkoa da Kostaldeko Bidegorria amaitzea. Urrestillako bidegorria ez da kapritxo bat, herritarren eskaera historiko bat da eta ez da justua bat edo bestearen arteko aukeraketa planteatzea. Bidegorriak etorkizuneko apustuak izan behar dira, osasuntsuak direlako eta herriak konektatzeko balio dute, azpiegitura hauen aldeko apustua egin behar da”.
Bidegorria eraikitzeko idatzitako proiektua Gipuzkoako Bizikleta Bideen Lurralde Plan Sektorialaren Urola bailarako 5. ibilbidearen zati izango da eta 1.500.000 euro inguruko aurrekontua izango du guztira.
