Azpeitiko Udalak irmo salatu nahi du asteburuan Donibane Garazin bere bikotekide ohiak hildako emakumearen heriotza matxista. Hildakoaren senitarteko zein gertukoenei beren elkartasuna adierazteaz gain, herritar guztiak eraso horiek salatzeko antolatu daitezkeen ekimenetan parte hartzera animatu nahi ditu.
Indarkeria matxistak ez du etenik gaur egungo gizartean; arazo benetan larria da, gizon eta emakumeen berdintasun ezetik sortua. Giza eskubideen urraketarik ez duela onartzen berretsi nahi du Udalak; ez Azpeitian eta ez beste inon eta urraketen aurrean modu aktiboan jokatzea herritarron ardura ere badela gogorarazi nahi du.
Erasoren bat gertatzen ari dela ohartuz gero Udaltzaingora, Ertzaintzara edota larrialdi zerbitzuetara deitzea ezinbesteko betebeharra dela ohartarazi nahi du. Denon ardura eta betebeharra da indarkeriari aurre egitea.
Horretaz gain, egunerokoan ikastetxeetan Udalak bultzatutako hezkidetza programen bidez zein beste hainbat ekimenen bidez pertsonen arteko berdintasuna landuz indarkeriaren kontra lanean jarraituko duela berretsi nahi du.
Indarkeria matxistaren telefonoa: 016
Udaltzaingoa: 943 15 13 13
Ertzaintza: 943 08 37 80
Larrialdi Zerbitzuak: 112
