Egunean zehar esku-hartze soziosanitarioan gaur egun dauden arazo eta gatazka etiko nagusiak aurkeztu eta aztertu dira, esku-hartze horretan aktiboki parte hartzen duten eragileak kontuan hartuta. Hala, Xabier Etxeberria Deustoko katedraduna, unibertsitate berdineko irakaslea den Maria Jesus Goikoetxea, biak esku-hartze soziosanitarioko etikan adituak, Osakidetzako etika asistentzialeko egiaztapen komisioko lehendakari Jose Luis Quintas edota Arrasateko gizarte-langilea den Olatz Etxabe izan dira hizlari.
Azpeitiko udalaren proiektu aitzindaria
Azpeitiko Gizarte Zerbitzuek ere presentzia nabarmena izan dute jardunaldietan, izan ere, Udalak martxan duen esperientzia aitzindariak jakinmin handia sortu du. 2014az geroztik, Azpeitiko Udala, osasun etxea, osasun mentalaren unitateak eta Zumarragako ospitalak koordinazio mahai bat jarri zuten martan, eta koordinazio hori lantzeko protokoloa orduan osatu. Horrela, Zumarragako ospitalean mahai tekniko bat eratu zen eta hiru lan-talde desberdin osatu ziren;
1.- Lehen arretako osasun sistemarekin. Anbulatorioa. Medikoek, erizainek, osasun zentroaren koordinatzaileak eta Udaleko teknikariak eta arduradunak hartzen dute parte. Bi aspektu lantzen dira: kasuen kudeaketa eta gai komunitarioak.
2.- Osasun mentala. Urtean 3 bilera egiten dira, eta bertan bi sistemako profesional guztiek hartzen dute parte. Osasun mentalaren inguruko gai amankomunak jorratzen dira.
3.- Zumarragako ospitalea. Demandaren arabera lantzen dira gaiak, batik bat, alta ospitalarioak, eta batik bat telefonoz egiten da lan.
Lan metodologia argia da; pazientea edo familia profesional guztiekin biltzen da, denak bide berdinean doazela ikusteko. “Mezu berdina eman behar da, koordinazioa egon behar du, pazienteak edo familiak ikusteko bere aurrean ari garela lanean, atzetik ez dela ezer egiten, eta asmo bakarra, pertsonaren hobe beharra dela”, dio Zubiak.
Gauza txikia ematen duen arren, pauso handia dela aitortzen du Udal Gizarte Zerbitzuetako teknikariak, izan ere, medikuek osasun arlotik bakarrik begiratzen dute, baina orain, udaletxera etortzen dira bilerara eta gaixotasunek arlo sozialean ere eragina dutela ikusten dute, eta denon artean, egoerari itzulia eman edota aterabidea ematen saiatzen dira. “Adibidez depresioa duen norbaiti pastillak ematen zaizkio, baina zergatik iritsi den egoera horretara jakin behar dugu. Izan ere, gaixotasunak berak sozialki duen eragina altua da. Osotasunean jorratzean gertuago egongo gara pertsona sendatzeko edo hobeto egoteko. Hori da garrantzitsua, pertsona. Eta gaur bezalako jardunaldia Azpeitian antolatzea ikaragarria da”, dio.
Gainontzeko herrietan ere lan metodologia bera erabiltzen den arren, Azpeitiko Udalak pauso gehiago eman ditu zentzu honetan, “osasun mentalaren inguruko lan taldea hemen bakarrik jorratzen da, eta anbulatorioarekin dagoen elkarlanean ere pauso gehiago ditugu. Guzti honek, Bartzelonan Azpeitiko ereduaren berri ematera ere eraman gaitu”, azaldu du Zubiak.
Azpeitiko Udalarentzat “arrakastatsua” izan da, “oso” jardunaldi hau, eta balorazio horrekin guztiz bat etorri dira Deusutko arduradunak ere: “jende asko etorri da, inguruko herrietatik ere bai, eta gaia interesgarria dela argi gelditu da”. Entzule gisa egon direnek ere “oso interesgarritzat” eta beharrezkotzat jo dute gisa honetako jardunaldiak egitea, eta balorazio oso positiboa egin dute.
