Udalak eta Ekoetxeak elkarlanean antolatutako egunean, herriko ikastetxeek, Lagun Onak Mendi Bazkunak, Baigerak eta baratze parkeetako erabiltzaileek hartuko dute parte. “Herritarrak bertan parte hartzera gonbidatu nahi ditugu, familian zein lagun artean goizaz gozatzeko”, adierazi du Bereziartuak.

Parte hartzaileak bi ordu inguru arituko dira zuhaitzak landatzen eta hamaiketakoa egiteko tartea ere hartuko dute.

Berdeguneen zainketa eta garrantzia
Josu Labaka zinegotziak azaldu duenez, Zuhaitz Eguna "forma hartzen ari da", eta urtez urte geroz eta jende gehiagok hartzen du parte egitasmoan. Udalak herritarrak berdeguneen balioaz sentsibilizatzeko bidean, Zuhaitz Eguna urrats bat gehiago dela esan du Labakak, eta ingurumenaren zaintzan herritarrak subjektu aktibo izatea nahi dutela adierazi du: “Agintaldi hasieratik berdeguneen zaintza planifikatu eta egoki bat egiteko asmoz ari gara lanean”. Bide horretan, azken 2-3 urteotan 300 zuhaitzetik gora landatu ditu Udalak herriko txoko desberdinetan. “Zuhaitzak landatzeaz gain, ditugunen azterketa ere ari gara egiten, pixkanaka. Hori dela eta, tartean zenbait zuhaitz ordezkatu ere egin behar izan ditugu ihartuta edo gaixo zeudelako”, azaldu du. Loiolako Inazio hiribideko problematika ere azaldu nahi zan du: “Landaketa aldi desberdinetako zuhaitzak daude. Duela 60 bat urte landatutako bi tilo barietate daude. Sustrai txikiko zuhaitz handiak dira, eta herritarren segurtasuna bermatzea denez lehentasuna guretzat, pixkanaka ordezkatzen ari gara”, azaldu du. Botatzen ari diren zenbait zuhaitzen enborretan barrutik erabat janda daudela ere ikus daitekeela gaineratu du. “ Berdeguneak herritarron bizi kalitatean eragiten dute. Ezinbesteko funtzioa dute, eta guk horien garrantzia balioan jarri nahi dugu, zainduz zein Zuhaitz Eguna bezalako ekimene bidez”, bukatu du Labakak.