Lan horiek nahikoa ez direla uste du Udalak, hala ere. Urola ibaiaren hainbat puntutan sortzen diren gain begetazio eta harrien bilketaren jakitun da, eta horrek ibaiak ur asko dakarrenean sortzen dituen arazoak ikusita, ibaien ardura duen Gipuzkoako Urak agentziari eta Gipuzkoako Foru Aldundiari hilabete luzez zubietako begiak garbitu eta gain begetazioari irtenbidea bilatzeko eskaerak egin dizkio: “Guk beharra ikusteaz gain, herritar asko ere etorri izan dira udaletxera ibaiko harri eta begetazioa gehiegizkoa dela esanez kezkatuta. Baina legez ibaiak ezin ditu Udalak garbitu (Ur Agentzia eta Aldundiaren baimena behar da horretarako), eta legearen arabera fauna eta flora basbeteko ezin da begetazioa nahi bezala kendu”, adierazi du Aitor Bereziartua Ingurumen Batzordeburuak.
Zubietako garbiketa abian jarrita, ibaiko beste hainbat puntutako zuhaitz eta begetazioaren inguruan hitz egin eta neurriak hartzeko azaroan berriro bilduko da Udala Urak agentziako arduradunekin: “Guk ere ibaiko fauna eta flora babestearen alde egiten dugu, baina negua dator, euria egingo du, eta uholde arriskurik ez izateko hartu beharreko neurri guztiak hartu nahi ditugu”, dio Bereziartuak, gaiaren gainean daudela zehaztuz.
