wrapper

Oharrak

Argi adierazi dute gaur prentsaurrean Haujijijai! festa batzordeko kideek eta udal arduradunek: erasoek ez dute tarterik Azpeitian, ezta festetan ere. Horregatik, iaz egin bezala festetarako kanpaina berezia prestatu dute, elkarlanean. Hala, aurten iaz bezala karpa jartzeaz gain, taberna eta txosna gunean lanean arituko direnekin lanketa berezia egin da. 

Gizartean dagoen "gaitz larria" honi irtenbidea bilatzeko lanean ari dela Udala adierazi du Eneko Etxeberria alkateak. Arazoa errotik mozteko "ezinbestekoa erakundeek baliabideak jartzea, ez da nahikoa adierazpenak egitea, eta guk beharrezkoa dena jarriko dugu". Festetan "dena libre da" kultura zabaltzen da, eta erasoak, eta batez ere, eraso matxistak areagotzen dira, baina norbaitek Azpeitian datozen egunotan araurik ez dela egongo pentsatzen badu, argi ibiltzeko ere adierazi dute. 

Tamalez, uda hasierarekin batera, festak hasi eta erasoei loturiko txar ugari entzun dira, gertu ere bai, eta "kezkatzeko albisteak" direla aitortu du Etxeberriak. Mota guztietako erasoen aurrean argi eta adi jokatzeko eskatu die alkateak herritarrei: "Izan zaitezte gure begi eta belarri. Eta erasoren bat ikusi eta somatzen baduzue, egin aurre. Dudaren aurrean ere, badezpada, eman abisua, gerturatu. Guztiok ondo pasatzeko festetan, guztiok ibili eta sentitu behar dugu gustura eta seguru". 

Taberna eta txosna gunean, arreta

Festa giroa nagusi izaten da taberna eta txosna gunean, eta erasoak izateko lekuak izanik lanketa berezia egin da aurtengo kanpainan. Taberna guztietara banatu da erasoren bat gertatzen ari dela somatzen badute nola jokatu adierazteko esku-hartze protokoloa. Eta erasoa gertatzen bada ere zein den jarraitu beharreko protokoloa adierazi zaie. Hala, tabernariei pegatinak ere banatu zaizkie, hala nahi dutenek soinean jarri eta beren konpromisoa azaltzeko eta erasotua den emakumeentzat erreferentzia izan daitezen. 

Karpa prebentzio, arreta eta erantzuna errazteko

Leire Etxaniz Parekidetasun zinegotziak, adierazi du prebentzioari "garrantzia" eman zaiola. “Erasoei aurre hartu behar zaie, eta horregatik sakondu dugu sentsibilizazioan, formazioan eta informazioan". Horretarako, arretarako karpaz iaz egindako balorazioa positiboa izan zela, eta aurten ere arratsaldetik ordu txikiak arte Plaza txikian izango da.

Gaineratu du edozein erasok "berehalako erantzuna" izango duela, erasotuari eman beharreko arretak "lehentasuna" bermatzea izango dela helburu, erasotuaren erabakia "beti errespetatuko" daa eta erasotzaileak "baztertu" egingo direla. Horiez gain, "egiazko informazioa" erabiltzeko deia egin du.

Haujijijai! Festa batzordeko Leire eta Miren Arrietak hiru ardatzen baitan lanean daramatzatela urteak adierazi dute: perbentzioa, arreta eta erantzuna. Hala, gogorarazi dute “Ez beti dela ez”.

 

Jakinarazten dizugu webguneak berezko zein beste batzuen cookieak dituela, eta horien bidez zerbitzu hobea eskaini nahi dizugu, eta nabigazio-esperientzia hobetu nahi dugu. Webgunetik nabigatzen jarraitzen baduzu, horrek esan nahi du onartzen duzula aipatutako helburuekin cookieak erabiltzea Informazio gehiagorako Cookien politika.

Webgune honetako Cookien politika onartzen dut

EU Cookie Directive Plugin Information