2006ko proiektua da Sanjuandegi auzoan uholde arriskuak gutxitzeko obrak egin eta Etxebeltz izarrako urbanizazioarekin lotzea. Iaz, zubia eta bestelako urbanizazio lanak egin aurretik bi aldeetako auzotarrekin bilera irekia egin zen proiektua azaltzeko. Obrak hasi ostean ere, hainbat bizilagunek horrela eskatuta bilerak egin dira.
Autobus geltokia Sanjuandegin
Azken hilabetean, autobus geltokiarekin sortu da eztabaida bi auzoetako bizilagunekin. Alde bateko zein besteko hainbat bizilagunekin banaka bilerak egin ostean, ekainaren 7an, bilera irekia egin zuen Udalak, herritarren gehiengoaren nahia zein zen ikusteko. Autobus geltokia aldatzeko kontsentsu nahikorik ez dagoela ikusi zuen Udalak orduan, eta Gipuzkoako Foru Aldundiak ere zubitik autobusak pasatzeko arazo teknikorik ez dagoela baieztatu ostean, autobus geltokiak bere ohiko geralekua izaten jarraituko du Sanjuandegin. Bileran bertan jakinarazi zuten udal ordezkariek hori, eta ondoren aurkeztutako alternatibak aztertu ostean ere horixe jakinarazi zitzaien bi auzoetako ordezkariei. Hala ere, parte hartzerako ordenantzak arautzen dituen pausoen bidez proposamenak egin ahalko dira.
Autobusen joan-etorria egokitzeko eta hobetzeko, ordea, Foru Aldundiak eskatuta, hobekuntza batzuk egin behar dira, eta horretan hasiko da bihar bertan Udala. Horretaz gain, trafikoan ere aldaketa batzuk egin behar dira. Egokitzapen horiek bukatzean, autobusak berriro Sanjuandegin izango dute geltokia.
