wrapper

Oharrak

Otsailaren 3an inauguratuko da Azoka plaza

Otsailaren 3an inauguratuko da Azoka plaza

Herritarrentzako ohiko bilakatu da azoka plazan bueltaka ibiltzea, baina obrak guztiz bukatuta, otsailaren 3an inauguratuko da, 12:00etatik aurrera. Gaur Aitor Bereziartua eta Josu Labaka zinegotziak azokan izan dira ekitaldiaren berri eman eta baserritarrak bertara gonbidatzen. Ekitaldia, hala ere, irekia izango da herritarrei. 

Luze joan badira ere obrak, azoka plaza berritzearekin bat bertako produktuen aldeko apustu sendoa egin eta azoka plazan proiektu berritzailea jarri da abian: 150 kilometroren barruan ekoitzitako produktuak salduko dira bertan. Horretarako ohiko azokak egiten jarraituko dute baserritarrek, eta Elikagunea deituriko denda iraunkorra ere jarriko da abian. Bertan sukaldatutako jakiak ere izango dira salgai. Elikagunea otsailaren 3an irekiko da. “Gure herrian oinarri sendoak dituen baserritarren tradizioa eta berrikuntza soziala batuz osatu dugu azoka”, azaldu du Josu Labaka zinegotziak. Bereziartuak, berriz, “azoka plazaren inaugurazioarekin herriko plazaren erabateko eraldaketa bukatuko da: Herritarrok estazio publiko ederra irabazi dugu”, gaineratu du.

Leer más
Ezerk, ezta euriak ere, zapuztu ezin duen festa!

Ezerk, ezta euriak ere, zapuztu ezin duen festa!

Izugarrizko festa izan da gaur iluntzean Azpeitian. 1.500 danborjoletik gora izan dire 27 taldetan, herriko Alde Zaharra zeharkatzen. Xirimiria egin badu tarteka ere, ezer ezin izan du zapuztu gaur kalean zegoen festa. Hamabietarako bost minutu falta zirela Oihana Labiano azpeitiar gazteak bertsoa bota du, eta 00:00etan zirela danbor hotsak bete du plaza. Behin San Sebastian Eguneko lehen kantua jota, Arrantzaleak taldeko kideak udaletxera igo dira omenaldia jasotzera. Udaletxean izan dira 1981. urtean danborra jotzen irten zuten lehen emakumeetako lau. Udalak Arrantzaleak taldeari 50 urteotako sansebastianetako ibilbidea errekonozitzeaz gain, berdintasunaren alde emandako pauso garrantzitsu hura ereeskertu nahi izan diete. 

Leer más
Formazio eskaintza indartzera dator IMH eta Udalak sinatutako hitzarmena

Formazio eskaintza indartzera dator IMH eta Udalak sinatutako hitzarmena

IMH eta Azpeitiko Udalak makina erremintaren inguruko formakuntza emateko hitzarmen sinatu dute gaur. "Formakuntza gizarte eraldaketarako tresna nagusia da. Pertsonak bizitzan barrena formatzen joaten gara, eta guk herritarrak ahalik eta profesional onenekin formatzea nahi dugu. Horregatik egiten dugu IMHrekin formazioarako hitzarmen eta apustu hau", adierazi du Eneko Etxeberria alkateak. 

Leer más
Herrigunean ere hondakinen bilketa sistema abian jartzeko atzera kontaketa hasi da: urtarrilaren 15etik aurrera jaso beharko dituzte herritarrek txipak

Herrigunean ere hondakinen bilketa sistema abian jartzeko atzera kontaketa hasi da: urtarrilaren 15etik aurrera jaso beharko dituzte herritarrek txipak

Azken hilabeteotan hiru lanketa berezi egin dira hondakinen bilketa sistema berria ezartzeko: landa eremuan, produktore haundiekin (komertzio, denda eta soziedadeak) eta herrigunean. Landa eremuko bilketa sistema berria abian da pasa den astelehenetik; produktore handiena martxan jarriko da astelehenean eta herritarren artean txipak banatzen ere hasiko dira, urtarrilaren 29tik aurrera edukiontziak aldatzen hasiko baitira. Jarrera baikorra dute Eneko Etxeberria Azpeitiko alkateak eta Aitor Bereziartua Urola Erdiko Mankomunitateko lehendakariak: "Ez dut zalantzarik epe motzean hondakinen %70 baino gehiago gaika bilduko dugula", adierazi du Etxeberriak. 

Leer más
Landa-eremuan, hondakinak ekarpen guneetan utzi beharko dira astelehenetik aurrera

Landa-eremuan, hondakinak ekarpen guneetan utzi beharko dira astelehenetik aurrera

Hondakinen bilketa sistema berria ezartzeko prozesua aurrera doa. Landa eremuan, lanketa egin ostean astelehenetik aurrera, urtarrilaren 8tik aurrera, gaika sailkatuta ekarpen guneetan utzi beharko dituzte hondakinak landa eremuko herritarrek. 

Leer más
Elkarlanean antolatutako Gabon ekintza ugari, bertan gozatu eta erosketak ere bertan egiteko helburuz

Elkarlanean antolatutako Gabon ekintza ugari, bertan gozatu eta erosketak ere bertan egiteko helburuz

Ukaezina da Azpeitian gero eta kale-giro edo herri giro handiagoa sorzten ari dela, eta Gabonetan ere horrela izan dadin, ekintza ugari antolatu dituzte eragileek aurtengorako ere. Ainara Larrañaga zinegotziak Elkarlana oinarri dela nabarmendu du: "Denetik eta adin guztientzako moduko ekintzak antolatzen saiatu gara", adierazi du. Ekintza horiek ordea, helburu zehatz batekin antolatzen direla azpimarratu nahi izan du: "Jendeak bere aisialdia Azpeitian pasatzea nahi dugu, baita Gabonetan ere, eta erosketan ere bertan egitea. Horrek gure ekonomia indartzen du, eta horixe nahi dugu: Azpeitia guztion bizileku eta erosleku izatea nahi dugu". 

Xabier Aldalur Bertan Merkataritza Elkarteko teknikariak Azpeitiko eskaintza "luxua" dela azpimarratu nahi izan du: "Merkatariontzat garrantzitsua da herrian horrelako eskaintza zabala eta indartsua izatea. Guk asko ekartzen dugu guztiok egidako ahalegina". 

Leer más
Alde Zaharreko eraberritu eta etxebizitzen eskaintza publikoa egiteko Elizkaleko 3 etxe-atariren erosketa hitzartuta du Udalak

Alde Zaharreko eraberritu eta etxebizitzen eskaintza publikoa egiteko Elizkaleko 3 etxe-atariren erosketa hitzartuta du Udalak

Pauso bat gehiago eman, eta Udalak Alde Zaharreko eraikinak eraberritu eta etxebizitzen eskaintza publikoa egiteko bidea urratu du. Lehen urrats honetan Elizkaleko 3 etxe-atari erosi ditu (24, 26 eta 28 bis) eta etxe-atari bakarrean 12 etxebizitza egingo ditu. Horretaz gain, Done Jakue kalean bi etxe-atari oso bereganatzeko falta zitzaizkion etxebizitzak ere eskuratu ditu, eta Errebaleko etxe-atari bat erosteko hitzarmena itxita.

Leer más
Baserritar jantzita, festa giroaz gozatzeko dena prest da

Baserritar jantzita, festa giroaz gozatzeko dena prest da

Ostegunerako dena prest du Udalak. Plaza 9 txosnak beteko dute; Azoka plaza berria ere Santo Tomasetako baserritarren hartuko du; herriko kaleak alaitzeko Bentazaharreko mutiko alaiak goizez eta Eonian elektrotxaranga arratsaldean izango dira, eta nola ez, aspaldian jende andana biltzen duen Dantza Suelto Txapelketa ere izango dira. Aurreikuspenen arabera, eguraldia ere lagun izango da. 

Leer más
Konpainia onean eta gabon bezpera eguerdian etorriko dira Mari Domingi eta Olentzero Azpeitira

Konpainia onean eta gabon bezpera eguerdian etorriko dira Mari Domingi eta Olentzero Azpeitira

Ohi baino ordu batzuk lehenago eta herriko haur eta gaztetxok ondo lagunduta iritsiko dira, aurten, Olentzero eta Mari Domingi. Abenduaren 24an, eguerdian, iritsiko dira herrira, eta ikastetxeetako haur eta gaztetxoek suzko antortxekin, ttuntturroek, txistulariek eta Juan Antxietako soinujoleek lagunduko diete kalejiiran. Azpeitiko Udalak antolaketan eta ekimenean parte hartuko duten guztiei egindako ahalegina eskertu nahi die. 

Leer más
19.292. 184,46 euroko aurrekontua onartu du Udalak, 2018an, herritarren bizi kalitatea hobetu eta ongizate gizartean eredu izateko

19.292. 184,46 euroko aurrekontua onartu du Udalak, 2018an, herritarren bizi kalitatea hobetu eta ongizate gizartean eredu izateko

2018ko aurrekontuak onartu zituen Azpeitiko Udalak atzo, aho batez. Eneko Etxeberria Alkateak Udal Gobernuak kontsentsuak lortzeko duen gaitasuna azpimarratu nahi izan zuen: "Azken 6 urteotan akordio zabalak lortzeko egin dugu lan eta lortu dugu. Hor daude Plan estrategikoa, aurrekontuak... Onartzen ditugun proiektuek gehiengoaren babesa izatea bilatzen dugu; bai herritarrena, bai beste alderdiena...". 2018ko aurrekontuak "aitzakiarik gabeak" direla gaineratu nahi izan du eta herrian, eta, batez ere, herritarrengan eraldaketa sakona eragingo dutela: "Ongizate gizartearen eredu izateko aurrekontuak osatu ditugu. Duintasuna ekarri nahi dugu herrira: duintasuna lan baldintzetan eta langabetuentzat; duintasuna babes sozialean eta duintasuna etxebizitza beharra dutenentzat". 

Bide horretan, zenbait partidak garrantzia berezia izango dute 2018an. Hala, orain artean bezala ekonomia sendotzen jarraitzea izango da apustu nagusienetariko bat: "Eustaten arabera %8,6koa da gure herriko langabezia, eskualdeko tasa txikiena dugu, baina lana egin nahi duen, eta lanposturik ez duen, herritar bat dugun bitartean ekonomia sendotzeko neurriak hartuko ditugu. Hala ere, duela hainbat urte jarritako neurriak berraztertu eta egokitu egin behar ditugu, egoera berri honi aurre egiteko. Lanpostuak sortu nahi ditugu, baina lanpostu duinak, sortzen diren postuen kalitateak oso kezkatuta gauzka" zehaztu du. Bide horretan, Ekonomia, enplegua eta formazioa partidak %25 egin du gora, iazkoarekin alderatuta. Formazioa eta hezkuntzari dagokionez, UEU eta Deustuko unibertsitatearekin Udalak dituen hitzarmenak oso positibotzak jo ditu, eta herritarrei kalitateko formazioa eskaintzeko, epe motzean beste hitzarmen garrantzitsu bat sinatu dela ere aurreratu du. 

Herritarren bizi kalitatean eragiteko beste bi aurrerapauso garrantzitsu ere bermatuko dira 2018ko aurrekontuekin: alde batetik, azken urteotan abian jarritako etxebizitza politikei jarraipena emateko pauso gehiago emango dira. Hala, Udalak esklabetako eraikinean alokairurako etxebizitzak eraikitzeaz gain, Alde Zaharra eraldatu eta balioan jartzeko neurriak hartzeko konpromisoa azaldu du. Eta, bestetik, ongizate gizartean eragiten jarraitzeko, 3. adinean okerren pasatzen ari direnei zuzenduriko laguntza bat jartzea aztertzen ari da Udala. Iaz 80 urtetik gorako herritarren egoera aztertzeko eginiko ikerketan irtendako ondorioen arabera zehaztuko dute laguntza. Aurten, 65 urtetik gorakoen artean egingo da ikerketa, herritarren beharrak ezagutzeko. 

Azpiegiturei dagokionez, herriarentzat garrantzitsu izango diren azpiegitura asko bukatzen ari dira; hala nola, azoka plaza eta Basazabal datozen hilabeteotan bukatuko dira, eta Soreasu eta Urrestillarako bidegorria egiten hasiko da Udala. 

Leire Goenaga Ogasun batzordeburuak Udalaren egoera ekonomiko "on eta egonkorrak", herritarren beharrei erantzun egokia ematea ahalbidetzen duela azpimarratu nahi izan du. Datutan sartuta, Etxeberriak aipatutako proiektuen isla direla datuak azaldu du: "Igoera nagusia izan duten partida nagusiak ekonomia eta gizarte zerbitzuenak izan dira. Justizia soziala lortzearen baitan pauso garrantzitsuak emango ditugu bai gizarte zerbitzuetatako laguntza berriaren bidez eta etxebizitza eskubidea bermatzeko emango ditugun aurrerapausoekin". Urrestillako bidegorria eta Soreasuko Sormen gunea proiektu garrantzitsu eta inbertsio handiak izanagatik hirigintzako partida jaitsi egingo da, hala ere, inbertsiotarako 2,3 milio inguru izango ditu 2018an Udalak., 

  

2018ko AURREKONTUA, ZENBAKITAN

Udalaren 2018ko aurrekontu orokorra:20.825.354,46 €

Udalaren aurrekontu propioa: 19.292. 184,46 €

Euskara Patronatua: 613.419,55 €

Udal Kirol Patronatua: 1.393.644,56 €

Azpeitia Berritzen, SA: 833.500 €

 

 SAILAK 2018ko aurrekontua Iazko aurrekontuekin alderatuta
Ogasuna eta kontuak 465.964,27 € -%37,8 (maileguen amortizizazioaren jaitsiera dela eta)
Hirigintza eta ingurumena 2.733.621,24€ - %11
Euskara eta hezkuntza 911.669,55€ + %17
Kultura eta gazteria 867.500€ +%3
Kirola 900.474,56€ + %6
Gizarte Zerbitzuak 1.779.700€ +%70 ( + %14,5)
Langileria eta antolakuntza 5.501.150,14€ + % 0,3
Festak 559.000€ + %13
Zerbitzu orokorrak 3.609.624,96€ + %1
Alkatetza 226.000€ + %3,7
Ekonomia, enplegua eta formazioa 1.339.479,74€ + %25
Parekidetasuna 152.000.000€ + %5,5
Baserriak 246.000€ -%1
GUZTIRA 19.292.184,46 €  
Leer más

Jakinarazten dizugu webguneak berezko zein beste batzuen cookieak dituela, eta horien bidez zerbitzu hobea eskaini nahi dizugu, eta nabigazio-esperientzia hobetu nahi dugu. Webgunetik nabigatzen jarraitzen baduzu, horrek esan nahi du onartzen duzula aipatutako helburuekin cookieak erabiltzea Informazio gehiagorako Cookien politika.

Webgune honetako Cookien politika onartzen dut

EU Cookie Directive Plugin Information