Nuarbek bere ur deposito propioa du, eta ez dago sare nagusiralotuta, hori dela eta, eta depositoan egon zitekeelakoan arazoa, urte hasieratik Beizamako ur depositotik bideratu da ura auzora eta depositoan bertan egokitze lanak egin dira. Hala ere, eta neurri gisa, martxoan, Nuarbeko ur hoditeria nagusia garbitu, purgatu eta egokitzen aritu da Udala, Gipuzkoako Ur Konsortzioarekin elkarlanean.
“Urteetan luzatu den arazoa izan da eta kezka handia izan dugu gai honen inguruan. Ura ezinbestekoa baita egunerokoan. Azkenean, badirudi behin-behineko irtenbidea bilatu dugula, baina Azpeitiko Udalak Urrestillatik hasi eta Nuarbe/Matxinbenta-ra ur sare nagusia eta Lasao-ko araztegira bideratutako sanemenduko hodiak konektatzeko lanean jarraituko du, lan horiek egiteko eskumena Gipuzkoako Aldundian eta Ur Konsortzioan baitute”, adierazi du Aitor Bereziartua Hirigintza zinegotziak. Ur zikinen arazoari irtenbidea emateko 97.000 euroko inbertsioa egin du Udalak.
Autobus geltokiko markesinak
Denon Artean parte hartze prozesuaren baitan, Udalak auzoetan egiten dituen bileretan, autobusa gelditzen den guneetan markesinak jartzeko eta auzo irteeran autoen abiadura mugatzeko neurriak hartzeko beharra azaldu izan dute nuarbetarrek hainbatetan. Eskari horiei erantzunez, bi noranzkotan bus geltokiak jarri dira eta horietara iristeko irisgarritasuna bermatu eta abiadura mugatuko duten zebra bideak ere margotu dira. Lan horietarako 72.000 euro bideratu ditu Udalak.
