Izatez, 53 edo 54. aldia ba omen da Santio egunaren bueltan (ez beti egun berean) sagardo txapelketa edo eguna egiten dela. Baina jarraian egiten den 45.a dela esatean ados jarri dira antolatzaile guztiak.
Eneko Etxeberria alkateak eskerrak eman nahi izan zizkien txapelketaren antolaketaz arduratzen direnei, "herriaren alde urtero egiten duten esfortzuarengatik", eta herritar guztiei luzatu zien gonbita, "bai liburu aurkezpenera, bai txapelketara" azaltzeko.
Aurten, txapelketan izango diren aldaketen berri Xebastian Lizasok eman zuen. 23 sagardogilek hartuko dute parte lehiaketan, eta irabazleak, orain arteko koparen ordez, Mikel Sanjuanek egindako garaikurra jasoko du.
Txapelketa berari dagokionez bada beste berrikuntza bat ere: Txapelketa herrikoia bakarrik izango da. "Konturatu ginen sagardogileek ez zutela sagardo berdina ekartzen txapelketarako eta herritarrentzako. Horregatik hasi ginen elkarteekin txapelketa herrikoia egiten. Gaur egun, badakigu sagardo berdinak ateratzen dituztela kioskoan eta plazan", eta horregatik txapelketa bakarra egingo dute.
Sagardoari buruzko liburua, Laxaro Azkunek ondua
Azpeitia eta sagardoa liburua osatu du 45. aldi honetarako Laxaro Azkune kazetariak eta Juan Joxe Agirreren argazkiekin osatu du liburua. Liburua zapatuan, udaletxeko pleno aretoan aurkeztuko da, 12:00etan. Aurkezpenean ez ezik, uztailaren 25ean ere izango da liburua erosteko aukera, plazan.
