Urte luzez isiltasuna nagusi izan bada ere, azken urteotan Azpeitiko Udalaren konpromisoa memoria berreskiratzea izan da: "bi aukera genituen, omenaldi ponpoxoetan gelditzea, edo ikerketa egitea. Eta Aranzadi zientzia elkartearekin elkarlanean ikertzeari ekin genion". Ikertu, historiari izen abizenak jarri, lekukotzat jaso eta zabaltzeko eta berriro horrelakorik gerta ez dadin "formatu eta informatzeko" lanean ari da Udala: "Gertatutako guztiaren oroimenenako terapiarik onena liburu hauek dira". Gaurkoan, Azpeitia 1936-1945 liburua sareratzeko eginiko lana aurkeztu da.
Historia, sarean
Aranzadi zientzia elkarteak eginiko lana sareratu du Digitalidadeak. Gotzon Barandiaran digitalidadeko kideak azaldu duen gisan, modu oso errazean sareratu dute. Liburuko datuekin datu basea egin dute, eta liburua zatika irakurtzeko aukera izateaz gain, herritarren izen abizenen inguruko jarraipena egiteko haria osatu dute, "datuak elkarren artean lotu baititugu". Beraz, izen batetik abiatuta, ibilbide osoaren jarraipena egin daiteke: "Oso modu errazean bilatu daiteke informazioa. Internet oso gutxi erabili dutenentzat ere informazioa bilatzeko oso modu erraza antlatu dugu".
Informazioa dinamiko bihurtzeko, berriz, atarira sartutako bakoitzean orria freskatu egiten da, eta liburuko pasarte berri bat ikusarazten da.
Liburuak herritarren eskura
81. urteurrenaren baitan, Azpeitiko Udalak Eusko Gudarostearen inguruan ateratako liburua ere debalde eskuragarri jarri du goizean. Oriandik eskuratu ez duenak udaletxera jo dezake, eta sarreran eskatu.
